रोटरी क्लब पंढरपूरतर्फे मुख्याध्यापक काशिनाथ गोगाव यांचा ‘नेशन बिल्डर अवॉर्ड’ने गौरव

३० वर्षांच्या शैक्षणिक सेवेला,शिक्षक दिनाच्या पार्श्वभूमीवर उल्लेखनीय कार्याचा सन्मान

पंढरपूर प्रतिनिधी- शिक्षक दिनाच्या पार्श्वभूमीवर शिक्षण क्षेत्रात गेल्या तीन दशकांपासून सातत्याने कार्यरत असलेले अक्षरनंदन प्राथमिक विद्यामंदिर,इसबावी येथील मुख्याध्यापक काशिनाथ गोगाव यांचा रोटरी क्लब ऑफ पंढरपूर यांच्या वतीने‘नेशन बिल्डर अवॉर्ड’ प्रदान करून गौरव करण्यात आला. शिक्षक हा केवळ विद्यार्थ्यांना विषयाचे ज्ञान देणारा व्यक्ती नसून विद्यार्थ्यांच्या व्यक्तिमत्त्वाची जडणघडण करणारा, संस्कार घडविणारा आणि समाजाच्या भावी पिढीला दिशा देणारा घटक आहे. या भूमिकेची जाणीव ठेवून श्री. काशिनाथ गोगाव यांनी मागील ३० वर्षांपासून शिक्षण क्षेत्रात सातत्याने योगदान दिले आहे. विद्यार्थ्यांमध्ये ज्ञानासोबतच शिस्त, संस्कार, सामाजिक जाणीव, आत्मविश्वास आणि जबाबदारीची भावना निर्माण करण्यासाठी त्यांनी केलेल्या कार्याचा या पुरस्काराच्या निमित्ताने गौरव करण्यात आला. शिक्षक दिन हा देशाच्या शैक्षणिक वाटचालीत शिक्षकांच्या योगदानाबद्दल कृतज्ञता व्यक्त करण्याचा दिवस आहे. डॉ. सर्वपल्ली राधाकृष्णन यांच्या जयंतीनिमित्त साजरा होणारा हा दिवस शिक्षकांच्या ज्ञानदानाच्या कार्याची आणि समाज निर्मितीतील त्यांच्या महत्त्वपूर्ण भूमिकेची आठवण करून देतो. अशा कर्तृत्ववान शिक्षकांच्या कार्याचा सन्मान हा समाजासाठी प्रेरणादायी ठरतो.काशिनाथ गोगाव यांनी आपल्या प्रदीर्घ सेवाकाळात विद्यार्थ्यांच्या शैक्षणिक प्रगतीबरोबरच त्यांच्या सर्वांगीण विकासावर भर दिला.शाळा,विद्यार्थी,पालकआणि समाज यांच्यातील समन्वयातून गुणवत्तापूर्ण शिक्षणाची प्रक्रिया अधिक प्रभावी करण्यासाठी त्यांनी सातत्याने प्रयत्न केले. मुख्याध्यापक म्हणून शैक्षणिक वातावरण निर्माण करणे, शिक्षकांना मार्गदर्शन करणे आणि विद्यार्थ्यांच्या हिताला प्राधान्य देणे या जबाबदाऱ्या त्यांनी प्रभावीपणे पार पाडल्या. रोटरी क्लब ऑफ पंढरपूरच्या पुरस्कार वितरण कार्यक्रमास रोटरी क्लबचे अध्यक्ष मिलिंद वंजारी,सचिव भारत ढोबळे, विश्वंभर पाटील,इंद्रजीत परिचारक,तसेच सिंहगड कॉलेज ऑफ इंजिनिअरिंगचे प्राचार्य माननीय कैलास करांडे यांच्यासह रोटरी क्लबचे पदाधिकारी व सदस्य उपस्थित होते. पुरस्कार स्वीकारताना काशिनाथ गोगाव यांच्या समवेत सूर्यकांत देसाई,महेश भोसले,सतीश चंद्रराव,शाम गोगाव तसेच कुटुंबीय उपस्थित होते. गेल्या ३० वर्षांच्या प्रदीर्घ शैक्षणिक सेवेला मिळालेला हा सन्मान त्यांच्या कार्याची दखल घेणारा असून, शिक्षक म्हणून समाजाच्या भावी पिढीच्या घडणीत योगदान देणाऱ्या सर्व शिक्षकांसाठी तो प्रेरणादायी ठरला आहे. “ज्ञानदानातून संस्कार आणि संस्कारातून सक्षम समाज घडविणे, हेच शिक्षकाचे खरे कार्य आहे.”