_संत शिरोमणी नरहरी महाराजांच्या आई-वडिलांच्या समाधी स्थळाची माहिती_
*पार्श्वभूमी आणि इतिहास*
संत नरहरी महाराजांचे घराणे हे मूळचे कट्टर शिवभक्त होते. त्यांचे वडील *अच्युत बाबा* आणि आई *सावित्रीबाई* हे दोघेही नियमाने भगवान शंकराची भक्ती करत असत. आयुष्याच्या उत्तरार्धात ते दोघे वृद्ध झाले तेंव्हा त्यांनी पंढरपूर नजीक असलेल्या *कोर्टी* या गावी जाऊन वास्तव्य केले. याच ठिकाणी शिवनामाचा गजर करत त्यांनी आपला देहत्याग केला.
*काशी तीर्थाची निर्मिती आणि धार्मिक महत्व*
कोर्टी येथील महाराजांच्या आईवडिलांच्या समाधी स्थळावर असलेल्या पाण्याच्या कुंडाला *काशी तीर्थ* म्हणून ओळखले जाते.
*गंगेचे अवतरण:*
संत नरहरी महाराजांचे आई-वडील अत्यंत कडक शिवभक्त होते. त्यांना आयुष्यात काशी विश्वेश्वराचे दर्शन आणि गंगा स्नान करण्याची तीव्र इच्छा होती. परंतु वृद्धत्वामुळे त्यांना काशीला जाणे शक्य नव्हते.
*चमत्कार आणि श्रद्धा:*
आपल्या माता-पित्यांची ही इच्छा पूर्ण करण्यासाठी संत नरहरी महाराजांनी भगवान शिवाची प्रार्थना केली. त्यांच्या भक्तीवर प्रसन्न होऊन साक्षात काशीहून पवित्र गंगेचे पाणी या ठिकाणी कुंडाच्या रूपात प्रकट झाले. अशी भाविकांची गाढ श्रद्धा आहे. म्हणूनच या कुंडाला *काशी तीर्थ* असे नाव पडले.
*तीर्थ स्थानाचे महत्व:*
या पवित्र तीर्थात स्नान केल्याने, काशीला जाऊन स्नान केल्याइतकेच पुण्य लाभते अशी वारकरी व सोनार समाजात धारणा आहे. महाशिवरात्री व संत नरहरी महाराज पुण्यतिथीच्या निमित्ताने भाविक येथे येऊन या तीर्थाचे दर्शन व स्नान करतात.
कोर्टी येथे अच्युतबाबा व सावित्रीबाई यांची जुनी समाधी असून त्यावर शिवपिंडीची स्थापना केलेली आहे. पंढरपूर पासून अवघ्या 7 किलोमीटर अंतरावर पंढरपूर - कराड रस्त्यावर असले कोर्टी हे गाव चंद्रभागा - भीमा नदीच्या परिसरात येते.
*भस्माचा डोंगर*
कोर्टी येथील कोर्टेश्वर महादेव मंदिराच्या परिसरातील भस्माच्या डोंगराची उत्पत्ती आणि धार्मिक महत्व याविषयी 2 प्रमुख कथा सांगितल्या जातात. हा डोंगर म्हणजे सामान्य माती नसून राखेंसारखी पांढरी करडी विभूती आहे.
*1. भगवान परशुरामाच्या महायज्ञाची कथा:*
प्राचीन काळात भगवान परशुरामांनी जगाच्या कल्याणासाठी या पवित्र भूमीवर एक अतिशय मोठा दिव्य महायज्ञ केला. त्या यज्ञातील समिधा, तूप आणि पवित्र द्रव्याची राख एकाच ठिकाणी साठून राहिली. काळाच्या ओघात त्याच राखेचे रूपांतर एका टेकडीत झाले. त्यालाच आज *भस्माचा डोंगर* म्हणून ओळखले जाते.
*2. ऋषींमुनींची तपश्चर्या आणि शिवभक्ती:*
कोर्टी हे क्षेत्र प्राचीन काळापासून ऋषींमुनींचे तपोवन होते. येथे अनेक ऋषींमुनींनी भगवान शंकराला प्रसन्न करण्यासाठी हजारो वर्षे कठोर तपश्चर्या केली. त्यांच्या होमहवनाची आणि धुनीची राख वर्षानुवर्षे एका ठिकाणी जमा होत गेली. असे मानले जाते की, भगवान शंकराने प्रकट होऊन या तपोभूमीत स्वतःचे अंगाचे भस्म टाकले होते.
*भस्माचे विशेष गुणधर्म आणि परंपरा:*
- *मनोकामना पूर्ण करणे:* भाविक आपली मनोकामना पुरी व्हावी म्हणून या भस्माच्या टेकडीवर लहान लहान दगड एकमेकांवर रचून घरासारखा आकार तयार करतात. असे केल्याने स्वतःचे घराचे स्वप्न पूर्ण होते अशी श्रद्धा आहे.
- *चमत्कारी गुणधर्म:* येथील भस्म घरी नेऊन कपाळाला लावल्याने घरातील नकारात्मक ऊर्जा दूर होते. आजारपण बरे होते. मनाला शांती लाभते.
- *अक्षय साठा:* भाविक दरवर्षी या डोंगरातून भस्म आपल्या घरी घेऊन जातात. तरीही या डोंगरातील भस्म कधीही संपत नाही. हा येथील एक मोठा चमत्कार मानला जातो.
*"कोर्टी येथे आल्यावर प्रत्येक भक्ताने काशी तीर्थात स्नान करून भस्माचा डोंगराला वंदन करावे. येथील मातीतच संत नरहरी महाराजांच्या संस्कारांचा सुगंध आहे. आई-वडिलांच्या समाधीचे दर्शन घेतल्याने जीवनात शांती आणि समाधान लाभते."*
*श्री संत नरहरी महाराज की जय!*
*जय कोर्टेश्वर! 🙏*
*- वसंत रा. पोतदार.*
*सोलापूर.*
